Hundrað ára kvikmyndasaga Skyttnanna þriggja

Ný kvikmynd byggð á samnefndri sögu Alexandre Dumas um skytturnar þrjár verður frumsýnd um helgina. Þrívítt stórskotalið frá Hollywood er í helstu hlutverkum, ólíkt því sem var þegar maður að nafni Sydney Booth lék D‘Artagnan fyrir hundrað árum.

The Three Musketeers, 2011-útgáfan, segir frá því að þegar skytturnar þrjár, Athos, Porthos og Aramis, eru í öngum sínum eftir að hafa verið sviknar af samstarfskonunni, hinni íðilfögru Milady. Til stóð að brjótast inn í dularfulla hvelfingu Leonardos Da Vinci í Feneyjum og ræna þaðan dýrgrip en Milady ákveður að taka málin í sínar hendur og selja gripinn til hertogans af Buckingham. Skytturnar rekast hins vegar á hinn unga og hugrakka D‘Artagnan og saman berjast þeir gegn ranglæti heimsins. Leikstjóri myndarinnar er Paul W.S. Anderson en í helstu hlutverkum eru Mads Mikkelsen, Logan Lerman, Orlando Bloom, Milla Jovovich og Christoph Waltz.

Kvikmyndaáhugafólk þekkir auðvitað söguna um skytturnar þrjár eins og lófann á sér enda hafa bæði Bandaríkjamenn og Frakkar gert bók Alexandre Dumas góð skil á hvíta tjaldinu. Þrátt fyrir alls konar útúrsnúninga á sögu Dumas er stef flestra myndanna það sama: D‘Artagnan kemur til Parísar í þeirri von að verða hluti af elítu-liði skyttnanna og saman berjast þeir við vonda kardínála og illa innrætta hertoga til að vernda þá sem minna mega sín undir einkunnarorðunum: „Einn fyrir alla og allir fyrir einn.“

Talið er að fyrsta myndin eftir sögunni hafi verið gerð í Frakklandi árið 1903 en fáar heimildir eru til um gerð hennar. Hins vegar er vitað að kvikmyndaver Thomas Edison, Edison Studios, gerði tvær stuttmyndir um ævintýri D‘Artagnans árið 1911. Þar lék Sydney Booth hina ungu hetju sem lærir sitthvað um lífið og hættur þess af skyttunum þrem. Amerískir kvikmyndagerðarmenn létu þar ekki staðar numið; tvær myndir voru gerðar á árunum 1914-1916 en árið 1921 birtist þögla kvikmyndastjarnan og goðsögnin Douglas Fairbanks í öllu sínu veldi sem D‘Artagnan, Fairbanks var þá ein skærasta stjarna Hollywood, hafði leikið bæði Zorró og Hróa hött.

Saga Dumas lifði góðu lífi í Hollywood og árið 1948 gerði MGM-kvikmyndaverið alvöru gullaldarútgáfu eftir bókinni með Gene Kelly, Lönu Turner, Vincent Price og Angelu Lansbury í helstu hlutverkum. Árið 1973 kom enn ein útgáfan, með Oliver Reed, Charlton Heston, Raquel Welch, Michael York og Fay Dunaway, en hún var það mikil að burðum að myndin var sýnd í tveimur hlutum; The Three Musketeers og The Four Musketeers sem kom út árið eftir.

Tuttugu árum seinna réðist svo Disney í að gera nokkurs konar Young Guns-útgáfu af sögunni, þar sem Charlie Sheen, Kiefer Sutherland, Oliver Platt og Chris O‘Donnell fóru fyrir leikarahópnum og þeir Bryan Adams, Rod Stewart og Sting sungu titillagið All for Love.

Fimm árum seinna var komið að Skyttu-myndinni sem tekur upp þráðinn þegar D‘Artagnan hefur tekið að sér að verja Loðvík sólkonung, gömlum vinum sínum til mikilla ama. Þeir vita hins vegar að sólkonungurinn á tvíburabróður sem situr bak við lás og slá og reyna að frelsa hann. Leonardo DiCaprio leikur spillta kónginn en þeir Jeremy Irons, John Malkovich, Gabriel Byrne og Gérard Depardieu eru skytturnar.

freyrgigja@frettabladid.is