Leyndardómar góðrar kjötsúpu eru mismunandi

Íslenski kjötsúpudagurinn er framundan um helgina á Skólavörðustíg. Hver kokkur þar á sitt leyndarmál við kjötsúpugerðina.

Dagurinn verður haldinn hátíðlegur á laugardag en kjötsúpa í boði fyrir gesti og gangandi er orðinn árlegur viðburður við stíginn. Í ár munu um 800 lítrar af eðalkjötsúpu vera í boði.

Á kynningu á deginum á Hótel Holti voru þrír af þeim kokkum sem verða með kjötsúpu á Skólavörðustígnum spurðir hvert væri leyndarmálið við góða kjötsúpu. Svörin voru mismunandi.

Úlfar Eysteinsson á Þremur frökkum segir að nostrið sé leyndarmál hans. Að gefa sér tíma og skvetta af og til lúku af kærleik í súpuna. Gústav Axel Gunnlaugsson kokkur á Sjávargrillinu segir að örlítill skammtur af chili og nóg af jurtum sé hans leyndarmál.

Eiríkur Ingi Friðgeirsson veitingamaður á Holtinu segir hinsvegar að suðan sé leyndarmálið. Hún eigi að vera löng og róleg. Súpan sé alltaf best á öðrum degi og að mati sumra enn betri á þriðja degi.