Aðildarviðræðum verði lokið fyrir kosningar

Formaður Samfylkingarinnar segist ætla að ljúka aðildarviðræðum við ESB fyrir kosningar árið 2013. Til þess verks hafi flokkurinn verið kosinn. Landsfundur Samfylkingarinnar var settur síðdegis í dag.

Í upphafi landsfundar Samfylkingarinnar var minningarathöfn vegna voðaverkanna í Útey og Osló, 22. júlí síðastliðinn og sameinuðust landsfundarfulltrúar í einnar mínútu þögn og söfnuðu saman rósum til minningar fórnarlambanna.

Í setningarræðu sinni kom formaður flokksins víða við. Hún tíundaði þann árangur sem náðst hefur í stjórnun ríkisfjármála frá hruni og byltingu í réttindum skuldara. „Allt þetta tókst okkur af því að unnið var skipulega eftir plani A strax frá upphafi en ekki B plani Framsóknarflokksins eða D plani Sjálfstæðisflokksins sem fram komu þremur árum eftir hrun," segir Jóhanna.

Þá sagði hún það markmið flokksins að ljúka viðræðum um aðild Íslands að ESB á tilskyldum tíma og þjóðin verði þeim sammála um kosti aðildar.

„Við munum klára þetta mál. Til þessa verks vorum við kosin og því umboð verðum við trú, allt til enda," segir Jóhanna. Þá taldi Jóhanna upp þau atriði sem ljúka þarf fyrir kosningar. Þar á meðal var að lækka atvinnuleysi, ljúka endurskoðun fiskveiðistjórnunarkerfisins og stjórnarskrárinnar, samþykkja rammaáætlun og stofna Auðlindarsjóð sem annast og ávaxtar með sjálfbærum hætti arð þjóðarinnar af auðlindum hennar.

„Ég heiti því að gera allt sem í mínu valdi stendur til að koma þessum málum í höfn áður en þessu kjörtímabili lýkur," segir hún.