Keppt í vondum lagasmíðum

Sérstök vondulagakeppni fer fram á skemmtistaðnum Bakkus þann 26. október næstkomandi. Það er söngkonan Rósa Birgitta Ísfeld sem stendur að baki keppninni, sem er nú haldin í annað sinn.

Keppnin var fyrst haldin árið 2007 og þá í tilefni afmælis Rósu sjálfrar. Fjöldi listamanna tóku þátt og var það break-dansari sem bar sigur úr býtum það skiptið. „Ég á marga vini sem eru í tónlist og flestir áttu þeir einhver vond lög í pokahorninu sem þeir gátu dregið fram og sent inn í keppnina. Fyrsta keppnin heppnaðist mjög vel og fólk veltist um af hlátri, enda voru mörg lögin alveg hræðileg,“ útskýrir Rósa.

Nú þegar hafa um tólf manns tilkynnt um þátttöku sína og þeirra á meðal eru Pollock-fjölskyldan, raftónlistarmaðurinn Futugrapher, plötusnúðurinn Gísli Galdur og saxafónleikarinn Ragnar Árni. „Það er mjög vandmeðfarið að semja vont lag. Síðast sendu til dæmi hipp hopparar inn danslag því þeim fannst það svo leiðinleg stefna en lagið sjálft var bara alls ekki vont. Það sem sumum finnst vont finnst öðrum ekki janf slæmt.“

Búið er að skipa dómnefnd og munu þau meðal annars taka mið af textasmíð, framkomu, búningum og hversu illa lögin eru spiluð. Rósa mun sjálf taka þátt í keppninni í ár og segist í leiðinni muna hefja sólóferil sinn. „Og kannski ljúka honum á sama tíma líka,“ segir hún og hlær.

Keppnin er opin öllum og geta áhugasamir fundið allar nánari upplýsingar á Facebook síðu Vondulagakeppninnar. - sm