Eitt par á kvöldi

Ég var sex ára þegar ég lærði að prjóna hjá ömmu minni á Sauðárkróki og hef verið að dunda mér við handverk alla tíð síðan,“ segir Ragnheiður S. Jóhannsdóttir, handavinnu- og sérkennari. Hún hefur undanfarin ár einbeitt sér að því að prjóna og þæfa litríka álfaskó sem vekja hvarvetna athygli.

Hugmyndin að skónum vaknaði fyrir um sex árum. „Þá kom til mín lítil stúlka með móður sinni. Hún fór að leika sér að litríkum garnafgöngum og spurði mig: „Getur þú ekki saumað á mig sokka úr svona mörgum litum?“ Ég játti því og bjó til handa henni skrautlega sokka úr afgöngum. Nokkrum dögum síðar kom hún til mín og spurði hvort ekki mætti setja á sokkana bjöllu því hún væri nýbúin að fá kött. Ég hélt það nú og þannig fæddist hugmyndin að álfaskónum,“ lýsir Ragnheiður sem fór í framhaldinu að leika sér með hugmyndina. „Lengstan tíma tók mig að þróa stærðirnar því sokkarnir eru prjónaðir risastórir og síðan þæfðir og mismikið eftir því hvort þeir eru ætlaðir fullorðnum eða litlum börnum,“ segir Ragnheiður.

Hún segist vart hafa undan að prjóna álfaskóna. „Þó er ég orðin fljót að prjóna og næ pari á kvöldi,“ segir hún glaðlega en skóna selur hún í Álafossbúðinni í Mosfellsbæ og Laugavegi og á sumrin í Bakkabúð á Djúpavogi. Ragnheiður býr einnig til lyklakippur í svipuðum stíl auk þess sem hún býr til þæfðar töskur skreyttar fiskroði.

Þeim sem vilja skoða álfaskóna nánar er bent á Facebook undir Álfaskór.

solveig@frettabladid.is