Þiggur umdeild verðlaun

Breski rithöfundurinn Ian McEwan hefur vakið deilur fyrir að þiggja Jerúsalem-verðlaunin í bókmenntum, sem afhent verða nú um helgina. McEwan var hvattur til að afþakka verðlaunin í mótmælaskyni við hersetu Ísraelsmanna í Palestínu.

Hann varði hins vegar ákvörðun sína í gær og sagði Ísrael vera land þar sem ríktu "sannkölluð lýðræðisleg skoðanaskipti". Höfundurinn bætti við að viðtaka verðlaunanna þýddi ekki að honum hugnaðist stefna ísraelskra stjórnvalda í einu og öllu. Hann teldi hins vegar vænlegra til árangurs að stuðla að og taka þátt í umræðu en að sniðganga Ísrael vegna hernámsins.

McEwan er einn virtasti höfundur Breta í seinni tíð og hefur skrifað bækur á borð við Friðþægingu, Laugardag og Brúðkaupsnóttina, sem allar hafa komið út í íslenskri þýðingu.