Tilnefndur til Emmy-verðlauna

Hermann Hermannsson klippari hefur verið tilnefndur til fernra New York Emmy-verðlauna fyrir vinnu sína við sjónvarpsþættina Knicks Poetry Slam. Verðlaunin eru systurverðlaun hinna þekktu Emmy-verðlauna og hafa verið veitt árlega frá árinu 1955.

Hermann flutti heim til Íslands í fyrravor eftir þriggja ára dvöl í Bandaríkjunum. Á þeim tíma starfaði hann hjá þarlendu framleiðslufyrirtæki sem framleiddi meðal annars sjónvarpsþættina Knicks Poetry Slam, en þeir hlutu alls sex tilnefningar. Þættirnir fjalla um samkeppni í ljóðaslammi. „Þessi sena er mjög stór og öflug í New York og keppnin hefur verið haldin árlega í mörg ár. Keppendurnir eru allir á aldrinum 13 til 19 ára og eru sigtaðir út þar til einn stendur uppi sem sigurvegari," útskýrir Hermann en þetta er í annað sinn sem hann er tilnefndur til verðlaunanna. „Ég fékk styttu fyrir fyrsta verkefnið sem ég tók að mér eftir að ég flutti til New York á sínum tíma."

Mikil vinna liggur að baki þáttanna og segist Hermann hafa unnið nánast daglega í þrjá mánuði við gerð þeirra. „Það var lítill peningur til og þess vegna þurftum við að leggja mikla vinnu í gerð þáttanna. Ég vann nánast daglega allan þann tíma og mér finnst eins og þessar tilnefningar réttlæti það svolítið," segir hann og hlær.

Aðspurður segir hann tilnefningarnar hafa mikla þýðingu enda geti þær greitt leið hans aftur inn á vinnumarkaðinn í Bandaríkjunum. „Ég er svolítið að skima aftur út og langar að geta verið í þeirri aðstöðu að hoppa fram og tilbaka á milli Íslands og Bandaríkjanna. Þessi tilnefning mun vonandi greiða götu manns í þeim efnum."

Hermann vinnur nú að sjónvarpsþáttunum Makalaus og segist hafa fengið leyfi frá samstarfsfélögum sínum til að vera viðstaddur verðlaunaafhendinguna í byrjun apríl. „Ég er farinn að hlakka mikið til. Mest hlakka ég til að hitta alla gömlu vinnufélagana aftur," segir Hermann að lokum. - sm