Palermo deilir út tískuráðum

Tískufyrirmyndin Olivia Palermo er loksins búin að stofna sína eigin vefsíðu og blogg þar sem hún gefur lesendum sínum ráð varðandi tísku og snyrtivörur. Palermo er þekkt úr raunveruleikaþáttunum The City, sem gengu á sjónvarpsstöðinni MTV fyrir nokkrum misserum, og síðan þá hefur hún verið fastagestur á tískuvikum úti um allan heim og vakið óskipta athygli fyrir skemmtilegan fatastíl.

Palermo er búsett í New York, og fyrir utan það að hafa verið lærlingur á bandaríska ELLE í raunveruleikaþáttunum vinnur hún við að þeysast á milli tískuviðburða og vera smart.

Mikill þrýstingur hefur verið á Palermo að stofna bloggsíðu, því hún á fullt af aðdáendum úti um allan heim og á vefsíðan oliviapalermo.com eflaust eftir að vera mikið lesin af tískuunnendum.