Biðu í tæpar átta klukkustundir

Um þrjú hundruð manns biðu í langri halarófu fyrir utan verslun Smekkleysu eftir miðum á tónleika Sinéad O’Connor sem voru haldnir í Fríkirkjunni í gærkvöldi.

Eins og með miðana á Biophilia-tónleika Bjarkar á miðvikudag fengu aðeins þeir miða sem voru þegar búnir að tryggja sér armbönd á Airwaves-hátíðina. Hörðustu aðdáendur O’Connor biðu frá klukkan hálffjögur um nóttina eftir miðunum, í tæpa átta tíma, en verslunin var opnuð klukkan ellefu. Fjögur hundruð miðar voru í boði og voru enn nokkrir miðar eftir á tónleikana um hádegisbilið í gær. „Röðin kláraðist á tíu mínútum. Það var greinilega ekki eins mikið stress á þessu og fyrir Bjarkartónleikana. Þá voru færri miðar í boði og fólk kannski enn áhugasamara,“ segir Kristján Kristjánsson, eða Kiddi Rokk hjá Smekkleysu. „Þetta gekk „brillíant“ vel. Fólk fékk allt miða sem langaði í þá.“ Að sögn Kidda voru fleiri Íslendingar í röðinni vegna Sineád O’Connor en fyrir Bjarkartónleikana og meðalaldurinn hærri.

Á sunnudaginn verða miðar í boði á síðari tónleika Bjarkar á Airwaves. Þá verður verslun Smekkleysu opnuð klukkan 13 og má einnig búast við langri biðröð vegna þeirra tónleika.

- fb