Árita Liverpool-bók með gömlum Liverpool-goðsögnum

„Þetta er eiginlega tólf daga kynnisferð en við náum sem betur fer tveimur leikjum,“ segir Arngrímur Baldursson, þýðandi og annar höfunda bókarinnar Liverpool: The Complete Record.

Hann er ásamt meðrithöfundi sínum, Guðmundi Magnússyni, farinn í mikla kynningarferð til Liverpool-borgar þar sem þeir ætla að kynna bókina sína. Þeir eru búnir að leigja íbúð í miðborg Liverpool undir sig og sína og munu í kjölfarið sinna viðtölum við sjónvarpsstöðvar, útvarp, dagblöð og netmiðla. Bókin Liverpool: The Complete Record inniheldur upplýsingar um alla leiki knattspyrnuliðsins Liverpool frá árinu 1892.

Bókin hefur þegar komið út í London en nú er komið að Liverpool og þá á að leggja allt í sölurnar. Arngrímur og Guðmundur árita meðal annars bókina í dag í Waterstones, sem er ein stærsta bókabúð Liverpool. Með þeim við áritunarborðið sitja goðsagnirnar Ron Yeats, sem er sá leikmaður sem hefur gegnt fyrirliðastöðu liðsins lengst allra, og Tommy Smith. Að sögn Arngríms er Smith einn allra harðasti varnarmaður félagsins frá upphafi. „Hann átti það til að tækla menn í herðar niður.“

Svo skemmtilega vill til að Liverpool mætir einmitt erkifjendunum frá Manchester United á Anfield í hádeginu og Arngrímur ætlar að sjálfsögðu á leikinn. „Það reyndist hins vegar þrautin þyngri að fá miða og ég grenjaði þá eiginlega út hjá miðasölunni,“ segir Arngrímur og hlær.

- fgg