Bleikur dagur á morgun

Október er mánuður Bleiku slaufunnar, árveknis- og fjáröflunarátaks Krabbameinsfélags Íslands gegn krabbameinum hjá konum. Af því tilefni eru allir landsmenn hvattir til að klæðast einhverju bleiku föstudaginn 7. október eða hafa bleikan lit í fyrirrúmi þann dag.

Bleiki dagurinn naut mikilla vinsælda á síðasta ári - ekki síst á vinnustöðum þar sem fjöldinn allur brá á leik, haldnar voru keppnir um skemmtilegasta klæðaburðinn og mikið gaman hlaust af.

Fólk er því hvatt til að njóta saman dagsins og vekja um leið athygli á árveknisátakinu.

Þá er fólk einnig hvatt til að senda myndir á laila@krabb.is til að setja inn á síður Krabbameinsfélagsins Krabb.is og www.facebook.com/bleikaslaufan.

Klæðumst bleiku á morgun til tákns um samstöðu í baráttunni gegn krabbameinum hjá konum.