Mikil vinna framundan - gerðu samning við Liberty

Verslunin Liberties í London hefur gert samning við hönnunarmerkið KALDA um sölu á nýrri línu þeirra. Liberty verslunin var stofnuð árið 1875 og var valin besta verslunin í London árið 2010 af Time Out Magazine.

Systurnar Rebekka og Katrín Alda Rafnsdætur hanna saman undir heitinun KALDA og reka einnig verslunina Einveru á Laugavegi. Þær voru á meðal þeirra íslensku hönnuða sem tóku þátt í sölusýningunni CPH Vision sem haldin var í tengslum við tískuvikuna í Kaupmannahöfn í byrjun febrúar. Þó nokkrir kaupendur sýndu KALDA áhuga á sýningunni og í kjölfar hennar gerðu systurnar meðal annars samning við Liberty í London.

Rebekka segir það mikinn heiður að vera valin inn í verslunina enda sé hún þekkt fyrir að sérvelja aðeins hágæða tískufatnað til sölu. Á meðal þeirra merkja sem fást í versluninni eru Eto, Sonia Rykiel og Vivienne Westwood og bætist KALDA nú í þeirra hóp. „Það er mjög óalgengt að verslunin taki inn unga og óþekkta hönnuði og þetta er kannski sérstaklega skemmtilegt út af því. Það er auðvitað líka ótrúlega skemmtilegt að KALDA verði svo inn á milli allra þessa flottu hönnuða," segir Rebekka.

Hún segir samninginn skipta sköpum fyrir merkið og að hann verði vonandi til þess að styrkja það í framtíðinni. „Þetta breytir öllu fyrir okkur. Við verðum bæði sýnilegri auk þess sem þetta mun styrkja okkur sem fatamerki á allan hátt. Samningurinn sem við gerðum núna er um nýjustu línu okkar og svo er það í raun upp á okkur komið að reyna að halda okkur þarna inni," útskýrir Rebekka.

Nýja línan ber heitir Rjúfland og lögðu systurnar mikla áherslu á fjölbreytileika og gæði við hönnun hennar og ber línan þess vel merki. Systurnar hyggja á frekari útrás og er Katrín Alda nú stödd í New York þar sem nýja línan verður sýnd á Rendez Vous sölusýnungunni um helgina. „Það er mikil vinna og spennandi tímar framundan hjá okkur," segir Rebekka að lokum glaðlega. -sm