Hitar upp fyrir The Go! Team

Retro Stefson hitar upp fyrir ensku hljómsveitina The Go! Team á tíu daga tónleikaferð um Þýskaland í mars.

The Go! Team er sex manna band sem blandar ýmsum tónlistarstefnum saman á hressilegan hátt. Sveitin spilaði á Iceland Airwaves hátíðinni árið 2006 og hefur á ferli sínum gefið út þrjár plötur, nú síðast Rolling Blackouts. Fyrsta plata hennar, Thunder, Lightning, Strike, var tilnefnd til hinna virtu Mercury-tónlistarverðlauna í Bretlandi árið 2005.

Unnsteinn Manuel Stefánsson úr Retro Stefson vonast til að upphitunin fyrir The Go! Team verði til þess að vekja enn meiri athygli á hljómsveitinni á erlendri grundu. Hann kannast lítillega við ensku sveitina. „Ég fór á tónleika með henni á Airwaves og hef aðeins hlustað á hana," segir hann og hlakkar til Þýskalandsferðarinnar.

Næstu tónleikar Retro Stefson verða á norsku hátíðinni By:Larm í febrúar en eftir tónleikana í Þýskalandi hefur stefnan verið sett á áframhaldandi tónleikaferðalag.

Í síðustu viku sagði Fréttablaðið frá væntanlegum samningi sveitarinnar við útgáfurisann Universal. Að sögn Unnsteins hefur hann ekki enn verið undirritaður og vildi hann því ekki tjá sig um samninginn að svo stöddu. Viðræður fóru af stað eftir að útsendari Universal í Þýskalandi fór á tónleika með Retro Stefson á Airwaves-hátíðinni síðasta haust og heillaðist upp úr skónum.- fb