Bond-myndin fær nafn

Búið er að afhjúpa hvaða leikkonur fá það eftirsóknarverða hlutverk að vera svokallaðar Bond-stúlkur í nýjustu myndinni um leyniþjónustumanninn James Bond. Þá er einnig komið í ljós hvað myndin sjálf heitir.

Bond-aðdáendur um allan heim fengu loks að vita hvað næsta James Bond-mynd á að heita, hún mun bera nafnið Skyfall eins og reyndar margir vefmiðlar höfðu getið sér til. Þetta kom fram á blaðamannafundi í London þar sem 23. Bond-myndin var kynnt formlega.

Þar var það einnig staðfest að Ralph Fiennes og Albert Finney yrðu í leikarahópnum, sem og Javier Bardem, en hann mun leika erkióvin Bond. Leikkonurnar Bérénice Marlohe og Naomie Harris verða Bond-stúlkur. Marlohe, þekkt frönsk sjónvarpsleikkona, verður hin glæsilega og orkumikla Severin en Harris, frægust fyrir leik sinn í sjóræningjamyndunum á Karíbahafinu, mun aftur á móti leika leyniþjónustukonuna Eve. Judi Dench og Daniel Craig verða síðan á sínum stað sem M, yfirmaður MI6, og James Bond.

Mikið hefur verið spáð og spekúlerað um Skyfall; því hefur verið haldið fram að myndin yrði lágstemmdari en aðrar Bond-myndir og meira gert úr dramatík og persónusköpun, myndin yrði með öðrum orðum ekki dæmigerð Bond-mynd. Þá hefur því verið haldið fram að myndin yrði ódýrari en hingað til hefur þekkst, enda hafi framleiðslu myndarinnar verið teflt í tvísýnu þegar MGM-kvikmyndaverið varð gjaldþrota.

Craig tók hins vegar af allan vafa og sefaði áhyggjur harðra Bond-aðdáenda á blaðamannafundinum. „Þetta verður Bond með stóru B-i. Þetta er allt í handritinu og við erum með frábært handrit,“ sagði aðalleikarinn, en handritshöfundarnir eru þeir John Logan, Neal Purvis og Robert Wade. Leikstjóri myndarinnar, Óskarsverðlaunahafinn Sam Mendes, tók undir þessi orð Craigs og bætti því við að hann hlakkaði mikið til samstarfsins við Craig og Dench. „Þetta er mikil áskorun fyrir mig.“

Þetta verður í þriðja sinn sem Craig skellir sér í Bond-gallann, en fyrri myndirnar tvær, Casino Royale og Quantum of Solace, hafa báðar tvær gert góða hluti í miðasölu og þénað yfir einn milljarð dollara. Skyfall verður frumsýnd hinn 26. október á næsta ári.

freyrgigja@frettabladid.is