Leikur hina illgjörnu Ma-Ma

Hin breska Lena Headey hefur verið ráðin í eitt aðalhlutverkanna í hasarmyndinni Dredd. Headey fer með hlutverk hinnar illgjörnu Madeline Madrigal, eða Ma-Ma, sem er leiðtogi gengis sem hefur tekið yfir Peach Tree City-hverfið þar sem meirihluti myndarinnar gerist.

Samkvæmt handritinu á persónan Ma-Ma að vera langt komin á sextugsaldurinn með stórt ör á kinninni og vörinni. Ráðning hinnar 37 ára Headey kemur því mörgum á óvart en hún á vafalítið eftir að skila hlutverkinu með sóma. Headey er þekktust fyrir leik sinn í hasarmyndinni 300 og fyrir aðalhlutverkið í sjónvarpsþáttaröðinni Terminator: The Sarah Connor Chronicles.