Hlakkar til að fá sér kebab í Köben

„Ég er eiginlega kominn með í magann af spenningi. Ég get ekki beðið eftir því að fara út, hitta mömmu og systur mínar, drekka Faxe Kondi og borða kebab,“ segir Arnór Dan Arnarsson, söngvari rokksveitarinnar Agent Fresco.

Þann 27. janúar verða miklir tónleikar á Nordatlantens Brygge með Agent Fresco, Lay Low og Mugison. Tónleikarnir verða Arnóri nokkuð mikilvægir enda bjó hann í Danmörku um langt skeið og hann getur ekki beðið eftir því að leyfa dönskum vinum sínum að heyra tónlistina sína sem fengið hefur frábæra dóma á Íslandi. „Við höfum reyndar spilað einu sinni áður í Danmörku, það var fyrir rúmu ári síðan og það var ekkert að marka þá tónleika. Nú er þetta alvöru. Það verður gaman að leyfa vinunum að heyra þetta.“

Arnór reynir að fara sem oftast út til Kaupmannahafnar en hefur gert minna af því að undanförnu, bæði vegna anna og svo er auðvitað orðið aðeins dýrara að fljúga á milli landanna. Hann hélt þó upp á jólin á danskri grund. „Þetta verður bara eins og spila í Reykjavík fyrir mig, ég er bara að fara heim,“ segir Arnór.

Agent Fresco hefur ekki gert mikið að því að spila í útlöndum þótt ekki hafi vantað tilboðin. „Þetta hefur bara verið eitt og eitt gigg. Við ætlum hins vegar að reyna að taka einhverja góða ferð í sumar,“ en sveitin hyggst hita upp fyrir útgáfutónleika sína í febrúar með smá hljómleikum á Sódómu á laugardaginn ásamt Loga úr Sudden Weather Change og Rökkuró. - fgg