ESB samningur tilbúinn á næsta ári

Björgvin G. Sigurðsson, þingmaður Samfylkingarinnar, telur að hægt verði að ljúka aðildarviðræðum við Evrópusambandið á einu ári. Eiginlegar viðræður munu hefjast í júní en rýnivinnu vegna aðildarumræðunnar lauk á dögunum. „Gangi samningsviðræður ágætlega held ég að svona eftir ríflega ár geti samningur verið að koma heim," segir Björgvin G. Sigurðsson í samtali við Vísi.

Björgvin á sæti í sameiginlegri þingmannanefnd fyrir ESB og Ísland. Hann segir að þar sé rætt um að þriðjungur samningsins gæti verið nokkuð fljótsaminn vegna EES samningsins. „En þetta eru nokkrir þungir kaflar og ég held að á svona rúmu ári þá ætti þetta að klárast," segir Björgvin.

Hann telur að kynningarstarf gæti síðan tekið um það bil ár þar sem já og nei hreyfing myndu takast á. „Þannig að eftir 2 ár, svona einhvern tímann á árinu 2013, þá sé þessu öllu saman einhvern tímann lokið," segir Björgvin. Það yrði þá hægt að dagsetja þjóðaratkvæðagreiðslu um ESB einhvern tímann á því ári.

Þorsteinn Pálsson, fyrrverandi formaður Sjálfstæðisflokksins og forsætisráðherra, á sæti í samninganefnd Íslands gagnvart Evrópusambandinu. Í grein í Fréttablaðinu í gær lýsti hann efasemdum um að hægt væri að klára samningaviðræðurnar með núverandi þingmeirihluta. Þessu er Björgvin ósammála.

Björgvin segist þó skilja sjónarmið Þorsteins. Það sé óheppilegt þegar sífellt sé verið að ráðast á umsóknarferlið. Í Pressupistli sem Björgvin skrifaði í dag gagnýndi hann ummæli Ögmundar Jónassonar innanríkisráðherra í hádegisfréttum Bylgjunnar. „Með lét hann fylgja hefðbundar staðhæfingar andstæðinga aðildar um aðlögunarferli í stað aðildarviðræðna og að borið væri fé á landsmenn til að liðka fyrir aðild," segir Björgvin í pistlinum. Slíkar staðhæfingar séu rangar, en þeim sé ætlað að gera ferlið tortryggilegt og spila á nótur þjóðernishyggjunnar.