Íslandsklukkan á leiðinni í sjónvarp

„Ég og Ólafur Egilsson ætlum að ganga alla leið með þetta," segir leikarinn og leikstjórinn Benedikt Erlingsson.

Benedikt og Ólafur vinna nú að sjónvarpsþáttum byggðum á Íslandsklukkunni eftir Halldór Laxness. Þættirnir taka mið af leikgerð Benedikts, sem sett var upp í Þjóðleikhúsinu í fyrra og gengur enn fyrir fullu húsi.

Benedikt er nú á fullu að undirbúa tökur á kvikmyndinni Hross. Friðrik Þór Friðriksson og Guðrún Edda Þórarinsdóttir framleiða myndina, sem verður tekin upp í sumar, og að tökum loknum fer undirbúningur fyrir Íslandsklukkuna á fulla ferð. Þættirnir verða sjö talsins og búast má við að leikaravalið verði svipað og í sýningu Þjóðleikhússins.

Hvar verða þættirnir sýndir?

„Við ætlum að sýna þættina á sjónvarpsstöð sem sýnir leikið sjónvarpsefni. Það verður ekki bolta­rásin - RÚV - heldur verðum við að sýna á Stöð 2 enda er það eina sjónvarpið sem stendur fyrir alvöru íslenskri dagskrárgerð," segir Benedikt.

„Ég held að hún verði að fá að njóta krafta okkar ef hún vill þiggja. Okkur finnst það vera í anda höfundarins að leita til þeirra sem vilja gera fallega og góða hluti."

Benedikt er mikill áhugamaður um Íslandsklukkuna og hefur meðal annars fjallað um söguna að Gljúfrasteini.

Ólafur Egilsson segir gott að vinna með manni sem hafi svo mikinn áhuga á viðfangsefninu. „Hann er vel inni í Klukkunni - sem vel er. Ég er nú að leika sjálfur í sýningunni og við erum búnir að liggja yfir þessu þannig að við eigum vel saman í spjalli um Klukkuna," segir hann.

„Og það þarf ekki að hafa mörg orð um hvort þessi saga eigi erindi við okkur eða ekki akkúrat núna. Eins og kerlingin sagði: Oft var þörf, en nú er nauðsyn." - afb