Kanye floppaði en fann ástina

Frumraun tónlistarmannsins Kanye West sem fatahönnuður gekk ekki vel, en fatalína hans KW by Kanye West lagðist ekki vel í tískuheiminn. Þegar ritstjóri bandaríska Vogue, Anna Wintour, var spurð um álit eftir sýningu West svaraði hún „Spurðu einhvern annan en mig“ en það þykir jafngilda dauðadómi í tískubransanum. Fleiri spekingar hafa kallað fatalínuna bæði illa saumaða og ófrumlega.

Þrátt fyrir að hafa ekki fengið góðar viðtökur brosti tónlistarmaðurinn breitt er hann fylgdist með öðrum sýningum á tískuvikunni, en kappinn ku hafa fundið ástina í París. Sú heppna er ofurfyrirsætan Chanel Iman, en hún gekk einmitt tískupallinn fyrir West og hafa þau sést náið saman á öðrum viðburðum í París.