Samstarf við Lady Gaga-hönnuð

Á opnunarkvöldi alþjóðlegu ráðstefnunnar You Are in Control í Hörpu á mánudagskvöld verður stefnt saman ólíkum listgreinum og sýnt hvernig myndlist, tónlist, leiklist, kvikmyndir, hönnun og tölvuleikir vinna saman með nýstárlegum hætti.

Eldar Ástþórsson og Fiona Cribben hjá CCP kynna afrakstur samstarfs fyrirtækisins við Nichola Formichetti, sem er þekktastur fyrir hönnun sína í kringum poppdívuna Lady Gaga og listræna stjórnun fyrir franska tískuhúsið Mugler. Tölvuleikurinn The Moogies, sem er fyrir snjallsíma og spjaldtölvur, verður kynntur. Hann er ætlaður börnum á aldrinum 2-6 ára og foreldrum þeirra. Hönnunarfyrirtækið Worn By Worship kynnir nýja heimildarþáttaröð, Couture Culture, þar sem rætt verður við unga tískuhönnuði.

Gagnvirka netleikhúsið Herbergi 408 verður einnig kynnt. Það hefur verið tilnefnt til Útvarps- og sjónvarpsverðlauna Evrópu fyrir verkið Jöklar. Kvikmyndavefurinn Icelandic Cinema Online verður kynntur, auk þess sem Weird Girls, Snorri Ásmundsson, Ásdís Sif Gunnarsdóttir og Þórður Grímsson sýna listsköpun sína.