Óútreiknanlegt úrslitakvöld

„Það er frábært að fá hann þarna inn. Hann þekkir þetta inn og út og er nörd nördanna,“ segir Guðmundur Gunnarsson, sem verður kynnir í úrslitum Eurovision á laugardagskvöld ásamt Páli Óskari, eins og Fréttablaðið greindi frá í gær. Ragnhildur Steinunn, sem hefur staðið við hlið Guðmundar í undankeppninni, verður erlendis og því ekki með að þessu sinni.

„Ef við værum ekki með Pál í úrslitaþætti Söngvakeppninnar væru þetta bara vörusvik. Ég held að margir áhorfendur yrðu svekktir ef hann yrði ekki einhvers staðar sýnilegur,“ segir Guðmundur.

Hann lofar skemmtilegu úrslitakvöldi þar sem mikið verður um að vera. „Við erum að leggja drög að því að byrja þetta af svolitlum krafti. Jafnvel að við sjáum einhverja tónlistarmenn sem við tengjum ekki almennt við Eurovision sem skemmtiatriði,“ segir hann og bætir við að einnig verði fylgst náið með úrslitakeppni hinna Norðurlandanna sem verður haldin á sama tíma.

Sigurvegarinn frá því í fyrra, Hera Björk, kemur í heimsókn, segir frá því sem á daga hennar hefur drifið undanfarið ár og tekur að sjálfsögðu lagið.

Guðmundur býst við að keppnin um sigurlagið verði æsispennandi. „Það eru ákveðnir þættir í þessu sem gera þetta óútreiknanlegt. Það hefur oft verið þannig að maður hefur nokkra sterka hugmynd um hvaða lag sigrar en við teljum að tvö ef ekki fleiri lög komi vel til greina.“ Sjálfur hefur hann skemmt sér vel sem kynnir keppninnar. „Þetta er ólíkt öllu öðru sem ég hef gert í fjölmiðlum hingað til og er skemmtilegra en ég átti von á, þótt ég hafi reiknað með því að þetta yrði skemmtilegt.“ - fb