Rífast vegna Siennu

Samband leikaranna Roberts Pattinson og Kristen Stewart stendur völtum fótum um þessar mundir og á það rætur sínar að rekja til ágangs Siennu Miller. Tímaritið Star heldur því fram að Miller sé stöðugt að senda Pattinson smáskilaboð og að það fari fyrir brjóstið á Stewart.

Pattinson og Miller skemmtu sér saman í London eftir frumsýningu kvikmyndarinnar Water for Elephants þar í landi og var Stewart ekki sátt við það. „Kristen og Robert rifust heiftarlega eftir að hún frétti af þessu og hún vildi fá að vita hvort eitthvað hefði gerst á milli þeirra. Sienna hefur einnig verið dugleg að senda Robert smáskilaboð í gríð og erg.

Kristen er fullviss um að hún sé hrifin af Robert,“ var haft eftir innanbúðarmanni.