Sóknarprestur hissa á hamingjuþætti

„Ég er ekki sár og ekki reiður, þetta er bara skrýtið. Það er svo langt síðan ég byrjaði með þetta," segir séra Þórhallur Heimisson, sóknarprestur í Hafnarfjarðarkirkju.

Þátturinn Hamingjan sanna, eftir hugmynd Ásdísar Olsen og Karls Ágústs Úlfssonar, hefur göngu sína á Stöð 2 í mars. Fréttir af þáttunum komu Þórhalli í opna skjöldu þar sem hann hafði komið hugmynd að svipuðum þætti byggðum á bók sinni Hamingjuleitinni á framfæri til dagskrárstjóra Stöðvar 2 á síðasta ári. „Þeir voru mjög áhugasamir, en voru á leiðinni í frí þannig að við ætluðum að heyrast," segir Þórhallur. „Svo er þessi þáttur allt í einu kominn núna - ekki með mínu efni, heldur einhverju allt öðru. Það er ekki á nokkurn hátt verið að stela neinu frá mér."

Þórhallur segist hafa fengið hugmyndina frá Svíþjóð, þar sem svipaðir þættir hafa verið á dagskrá. „Mér fannst þetta sniðugt eftir hrun vegna þess að það eru svo margir sem koma á hamingju­námskeið til mín og margir sem eru ekki hamingjusamir í dag," segir hann og ítrekar þó að þeim á Stöð 2 sé frjálst að vinna með þeim sem þeir vilja. „Ég var hissa á því að þeir skyldu ekki segja mér að þeir ætluðu að vinna með öðrum. En ég vona að þátturinn gefi fólki meiri bjartsýni. Þá er tilganginum náð."

Pálmi Guðmundsson, framkvæmdastjóri dagskrársviðs 365, segir aldrei hafa staðið til að gera tvær hamingjuseríur, að minnsta kosti ekki á sama tíma. „Við höfðum ekki fundað né átt samtöl við séra Þórhall Heimisson um þáttahugmynd hans en móttekið einn tölvupóst um áhuga hans á sams konar þáttaröð," segir hann.- afb