Óhrædd við að alhæfa um þjóðir á útbreiddri tungu

Lóa Hjálmtýsdóttir er söngkona FM Belfast en teiknar líka myndasögur. Hún hefur sent frá sér enska útgáfu bókarinnar Alhæft um þjóðir og óttast ekki viðbrögð þjóðanna sem alhæft er um.

„Ég held að flestum finnist gaman að alhæfa um þjóðir,“ segir Lóa Hlín Hjálmtýsdóttir, söngkona FM Belfast og myndasöguhöfundur.

Lóa sendi í síðustu viku frá sér rassvasabókina Generalizations about Nations, sem er ensk útgáfa bókar hennar, Alhæft um þjóðir, sem kom út árið 2009. Í bókunum myndskreytir Lóa furðulegar alhæfingar um 60 þjóðir sem eru flestar sprotnar úr hugarheimi hennar. Á meðal þess sem hún alhæfir er að Þjóðverjar séu svo uppteknir að fortíðinni að þeir verði gleymnir, að japanskar konur séu úrillar á morgnanna og að fátt gleðji börn á Havaí meira en lík sem reka á land. En óttast hún viðbrögðin, nú þegar búið er að þýða bókina á útbreiddara tungumál?

„Nei. Þetta er náttúrulega grín. Svo er ég ekkert svo viss um að hún fari á mikið á flakk,“ segir Lóa og bætir við að hörð viðbrögð geti virkað sem afbragðs auglýsing. „Fólk fattar ekki að með því að vera rosalega æst og skrifa ofstækisfullar hatursgreinar um eitthvað, þá auglýsir það bara hlutinn frekar.“

Lóa segist þó hafa lent í því að fólk telji hana vera með fordóma gagnvart fólki, en hún vísar því til föðurhúsanna enda sé hún að bulla í bókunum. „Þetta er ekki vísindalegt,“ segir hún.

Alhæfingarnar eiga ekkert skylt við algengar alhæfingar, eins og að Danir séu leiðinlegir eða Finnar þynglyndir. „Ég geri eiginlega grín að því. Sumir segja að Skotar séu nískir, hvað veit fólk um það?“

Þannig að þú óttast ekki að t.d. Þjóðverjar taki grínið óstinnt upp?

„Nei, Þjóðverjar eru rosa næs fólk.“

atlifannar@frettabladid.is