Frá lögum unga fólksins yfir í lög fyrir eldri borgara

Gerður G. Bjarklind, útvarpskona á Rás 1, stjórnaði óskalagaþættinum Óskastundin í 700. sinn í gærmorgun. Af því tilefni var haldið hóf henni til heiðurs og hún leyst út með blómum og púrtvíni af samstarfsfólki sínu í Ríkisútvarpinu.

„Á einhverju allt öðru átti ég von en þessu,“ segir Gerður. „En þetta er líkt þeim því þau eru svo sæt í sér og elskuleg, allir samstarfsmenn mínir. Ég er ekki hissa að því leyti og þetta var bara ógurlega gaman.“

Gerður hefur stjórnað Óskastundinni frá árinu 1997. Hún var einnig þulur en hætti því um áramótin 2004/2005 og á árum áður var hún einn af stjórnendum Laga unga fólksins. „Það er dálítið fyndið að byrja með Lög unga fólksins og enda með lög handa eldri borgurunum. Þá setur að mér sú spurning hvort þetta er ekki bara sama fólkið sem ég er að leika lögin fyrir,“ segir hún létt.

Í nóvember næstkomandi verða liðin fimmtíu ár síðan Gerður hóf störf hjá Ríkisútvarpinu. „Sumir segja við mig: „Vinnurðu enn þá hjá sömu stofnun?“. Einhvern veginn hugsar maður aldrei neitt út í þetta. Maður er þarna vegna þess að það er látið vel að manni og manni þykir gaman að vinna þarna.“

Hún verður 69 ára í september og ætlar að vera eins lengi með Óskastundina og hún hefur geð og heilsu til. „Þegar þetta er enn þá til staðar og mér líkar vel þá verð ég með þáttinn.

Ég vona að ég tapi ekki glórunni og geti verið fólki til ánægju, það er aðalatriðið.“

freyr@frettabladid.is