Spaghettí-plata í maí

Platan Rome, sem er samstarfsverkefni Danger Mouse úr hljómsveitinni Gnarls Barkley og ítalska tónskáldsins Daniele Luppi, kemur út 16. maí. Platan er undir áhrifum frá spaghettívestra­tónlist Ennio Morricone og var hún tekin upp í hljóðverinu Forum í Róm sem Morricone átti þátt í að stofna.

Jack White, fyrrverandi liðsmaður The White Stripes, og Norah Jones syngja hvort um sig í þremur lögum á plötunni. Hljóðfæraleikarar eru þeir sömu og spiluðu tónlistina í hinum sígildu vestrum The Good, the Bad and the Ugly og Once Upon a Time in the West. Upptökur stóðu yfir með hléum í fimm ár.