Versti söngleikur allra tíma

Framleiðandi söngleiksins Spider-Man: Turn off the Dark er afar ósáttur við þá gagnrýni sem hann hefur fengið í bandarískum fjölmiðlum.

Dagblöðin The Washington Post, The New York Times og The Los Angeles Times segja öll að þessi rándýri söngleikur sé einn sá versti sem hefur verið sýndur á Broadway. Söngleikurinn hefur verið forsýndur að undanförnu en mánuður er í frumsýninguna. Dagblöðin ákváðu engu að síður að birta gagnrýnina strax í stað þess að bíða fram að frumsýningu eins og vaninn er.

Framleiðandinn Michael Cohl telur skýringuna fyrir hinum slæmu dómum þá að gagnrýnendurnir séu ekki starfi sínu vaxnir, sem eru einmitt algeng viðbrögð við slíkum dómum. „Þeir sem hafa gagnrýnt sýninguna og segja að hún hafi ekkert merkilegt fram að færa eru ekki alvöru gagnrýnendur. Það er aldrei gott þegar fólk sem skilur ekki poppmenningu gagnrýnir poppmenningarviðburð,“ sagði Cohl.

Bono og The Edge úr hljómsveitinni U2 sömdu tónlistina við söngleikinn, sem hefur orðið fyrir miklum skakkaföllum. Frumsýningunni hefur ítrekað verið frestað og tæknivandamál hafa verið tíð, auk þess sem meiðsli leikara hafa sett strik í reikninginn. - fb