Eminem með söluhæstu plötu 2010

Rapparinn Eminem átti söluhæstu plötu síðasta árs í Bandaríkjunum, Recovery, sem seldist í 3,42 milljónum eintaka.

Eminem er þar með fyrsti flytjandinn sem kemst tvisvar á toppinn með söluhæstu plötuna síðan fyrirtækið Nielsen SoundScan hóf að taka saman sölulistann árið 1991. Eminem seldi 7,61 milljón eintaka af The Eminem Show árið 2002.

Platan Need You Now með Lady Antebellum varð næstsöluhæst á eftir Recovery. Í þriðja sæti varð sveitasöngkonan Taylor Swift með plötuna Speak Now. Þar á eftir komu ungstirnið Justin Bieber og breska söngkonan Susan Boyle.