Plöturnar rokseljast

Rokkdúettinn The White Stripes hefur flogið upp vinsældalista eftir að hann tilkynnti að hann væri hættur störfum. Samkvæmt vefsíðunni Amazon hefur salan á tónleika­plötunni og heimildarmyndinni Under Great White Northern Lights aukist um 2.644 prósent. Platan er í öðru sæti á lista vefsíðunnar Movers & Shakers sem tekur saman hæstu sölutölurnar. Aðrar plötur sveitarinnar sem komast á topp tíu á sama lista eru White Blood Cells og Elephant, sem hefur að geyma hið vinsæla Seven Nation Army.