Vitnisburður um þrautseigju íslenskra listamanna

Ráðgert er að fimm binda yfirlitsrit um íslenska listasögu komi út með haustinu. Fjórtán höfundar taka þátt í ritun verksins, sem Forlagið gefur út í samvinnu við Listasafn Íslands.

Yfirlitsritið Íslensk listasaga, sem væntanlegt er í haust, spannar tímabilið frá síðari hluta 19. aldar til upphafs 21. aldar og verður um 1.500 síður í stóru broti. Fjögurra ára vinna liggur að baki útgáfunni. Árið 2007 var Ólafur Kvaran ráðinn ritstjóri verksins, skipuð var ritstjórn og gerðir samningar við fjórtán höfunda um ritun verksins.

„Markmiðið var að gera vandað yfirlitsverk um íslenska myndlist fyrir íslenskan almenning," segir Jóhann Páll Valdimarsson, forleggjari hjá Forlaginu. Mikill metnaður hafi verið lagður í að gera ritið sem best úr garði, enda eigi það að verða veigamikill þáttur í íslenskri þjóðar- og menningarsögu.

Á síðum bókanna verða litljósmyndir af hundruð listaverkum, auk þess sem mikill fróðleiksbrunnur um íslenska listasögu verður nú aðgengilegur á einum stað.

„Ég get fullyrt kinnroðalaust að þetta er eitt mesta stórvirki sem ég hef tekið þátt í," segir hann. „Það er sennilega einsdæmi að jafn umfangsmikið verk komi út í heild sinni á sama tíma enda algengast að margra binda verk komi út með margra ára, jafnvel áratuga millibili. Ég vil því meina að Íslensk listasaga sé mikið menningarframlag, sem vert sé að gefa gaum á þessum erfiðu tímum."

Spurður hvort ekki hafi komið til greina að setja verkefnið í salt í ljósi árferðisins segir Jóhann Páll að það hafi vissulega komið til greina. „Hrunið hefur auðvitað valdið útgefendum sem öðrum ómældum erfiðleikum. En við létum slag standa. Eftir það hefur allt kapp verið lagt á að Íslensk listasaga verði að veruleika, bæði sem sígilt menningarrit en ekki síður sem vitnisburður um metnað og þrautseigju íslenskra listamanna og þeirra sem unna listum."

bergsteinn@frettabladid.is