Ofviðrið blæs út

Borgarleikhúsinu hefur verið boðið að sýna Ofviðrið í Þjóðleikhúsi Litháens á alþjóðlegri leiklistarhátíð í Vilníus í september næstkomandi. Þjóðleikhús Litháens er stærsta leikhús landsins. Leikstjóri Ofviðrisins, Oskaras Koršunovas, er Lithái en á dögunum fékk sýningin góða dóma í Lietuvos rytas, stærsta dagblaði Litháens.

„Við erum afar þakklát og upp með okkur yfir þessu boði, sem er mikil viðurkenning fyrir sýninguna og leikhúsið okkar,“ segir Magnús Geir Þórðarson, leikhússtjóri Borgarleikhússins.

„Sýningin er stór og viðamikil í sniðum en vonandi tekst okkur þrátt fyrir það að koma ferðinni inn í dagskrá leikhússins næsta haust og þekkjast þetta góða boð.“

Ofviðrið verður einnig á aðaldagskrá alþjóðlegu leiklistarhátíðarinnar Sirenos á vegum Borgarleikhússins í Vilníus. Þar eru sýnd þau litháísku verk sem skarað hafa fram úr á leikárinu auk örfárra erlendra sýninga sem þykja sæta tíðindum.