Svínastían bar sigur úr býtum

Sænska kvikmyndin Svinalängorna, eða Svínastían, hlaut Kvikmyndaverðlaun Norðurlandaráðs í gær. Heiðursformaður dómnefndar, breska leikkonan Helen Mirren, greindi frá þessu á blaðamannafundi í Kaupmannahöfn.

Leikstjóri Svínastíunnar er Pernilla August og er þetta hennar fyrsta mynd. Hún kom einmitt hingað til lands í byrjun september og var viðstödd frumsýningu hennar í Bíó Paradís. Í umfjöllun dómnefndar um myndina sagði: „Pernilla August hefur, ásamt félögum sínum, næmt auga fyrir smáatriðum og tilbrigðum og tekst að láta hið flókna líta út fyrir að vera auðvelt. Leikurinn er stórkostlegur og síðast en ekki síst er Svínastían persónuleg og frumleg leikgerð af metsölubók."

Svínastían var frumsýnd í Svíþjóð í desember í fyrra og hlaut August gagnrýnendaverðlaunin á kvikmyndahátíðinni í Feneyjum í fyrra. Auk þess hefur myndin verið verðlaunuð á kvikmyndahátíðum víða um heim. Kvikmyndaverðlaun Norðurlandaráðs nema um 7,5 milljónum króna. Þau skiptast jafnt milli leikstjóra, handritshöfundar og framleiðanda, til að sýna að kvikmyndin er listform sem krefst náins samstarfs þessara þriggja aðila.