Jólabjórinn kemur eftir 11 daga

„Það hefur alveg komið fyrir að einstaka tengundir klárast," segir Sigrún Ósk Sigurðardótttir, aðstoðarforstjóri ÁTVR, en jólabjórinn kemur í vínbúðir þriðjudaginn 15. nóvember næstkomandi. Um 15 til 20 tegundir verða í boði þetta árið, sem er svipað og í fyrra.

Veitingastaðir og barir tóku þó forskot á sæluna í dag og hófu að selja jólabjórinn sem hefur runnið ljúft ofan í landann síðustu ár. Sigrún segir að árið í ár verði ekki frábrugðið síðustu árum. „Við megum þó búast við einhverjum nýjum tegundum en ég á von á því að það verði engar stórar breytingar frá síðustu árum," segir hún.

Á síðasta ári seldust um 330 þúsund lítrar af jólabjór á tímabilinu 15. nóvember til 31. desember, en heildarsala bjórs á tímabilinu var 2,1 milljón lítrar. Jólabjórin var því um 16 prósent af heildarsölunni á tímabilinu.