Frumsýna glænýtt Partíþokumyndband

Hljómsveitirnar Prinspóló og FM Belfast hafa gefið út glænýtt myndband við lagið Partíþokan í tilefni af samnefndri tónleikaferð sveitanna. Partíþokan er grípandi lag og mun eflaust njóta nokkurrar hylli. Það kom upprunalega út á safnskífunni Hitaveitan en hefur fengið yfirhalningu í boði Árna Rúnars Hlöðverssonar í FM Belfast.

Tónleikaferðin Partíþokan byrjar á Græna hattinum á Akureyri á morgun, þar sem hljómsveitirnar FM Belfast, Prinspóló, Sin Fang og Borko munu skemmta. Stefnan er síðan sett á flesta aðra landshluta en þeir viðkomustaðir verða kynntir síðar.

„Haustið er að renna sitt skeið og veturinn að taka yfir kaldur, blautur og viðbjóðslegur. Það þýðir samt ekkert að stara í myrkrið eins og blindur kettlingur því það er spáð Partíþoku víða um land. Það verður sumsé þokalega góð stemming á Græna hattinum á laugardaginn, þokuljós og þokulúðrar, en munið bara að ganga hægt um gleðinnar dyr og verða ekki of þoklumælt,“ segir í partítilkynningu vegna tónleikanna.