Leið eins og ég væri kynskiptingur

„Mér leið eins og ég væri kynskiptingur úr kvikmynd eftir Pedro Almodóvar,“ segir Niels Thibaud Girerd, betur þekktur sem Nilli.

Í nýjasta þætti Týndu kynslóðarinnar var sýnt tónlistarmyndband þar sem Nilli fór með hlutverk glæsilegrar dömu sem á í ástarsambandi við Hemma Gunn.

„Þetta var mjög skemmtilegt en það var eitthvað virkilega rangt við þetta,“ segir Nilli.  Það kom honum sjálfum þó ekkert á óvart að hann skyldi taka sig vel út í gervinu.  „Ég er listamaður og get verið glæsileg kona ef ég vil það og ég vildi það þegar við tókum þetta upp.“

Spurður hvort það hafi verið skrýtið að leika svona náið á móti Hemma Gunn játar hann því.  „En Hemmi er stórskemmtilegur maður og það var gaman að vinna með svona stóru nafni. Hann átti samt erfitt með að hlæja ekki þegar hann sat á móti mér,“ segir Nilli.

Hann segist einnig vera ánægður með lagið sem fékk heitið Gleymdu Hemma Gunn. „Ég er ekki búinn að geta hætt að hlusta á það um helgina. Þetta er hittari,“ segir Nilli.