Móeiðar er sárt saknað eftir að hún strauk

„Auðvitað vill maður vita hvar hryssan er - hvor hún sé á lífi eða dauð," segir Guðrún Katrín Jóhannsdóttir, eigandi hryssu sem er búin að vera týnd í að minnsta kosti tvær vikur.

Hryssan ber nafnið Móeiður en hún er fjögurra vetra gömul. Hún tapaðist úr girðingu við Vatnsleysi í Biskupstungum fyrir að minnsta kosti tveimur vikum síðan. „Hún var búin að vera innan við sömu girðinguna síðan hún fæddist," segir Guðrún Katrín sem segir að hún hafi ekki strokið áður. „Það eru skurðir í kringum svæðið sem hún var á en það er búið að vera svo þurrt í sumar þannig þá komast hrossin á milli. Ég tel að það séu mestar líkur á að hún hafi komist þar burt," segir hún.

Móeiðar er sárt saknað en Guðrún Katrín segir að það hafi átt að fara temja hana í vetur. „Hún gæti leynst einhversstaðar þarna í sveitinni og ég hvet fólk til að líta í kringum sig í Bláskógarbyggð,“ segir hún.

Þeir sem hafa rekist á hryssuna eða vita um afdrif hennar er bent á að hafa samband við skrifstofu Bláskógarbyggðar í síma 486-8808 eða senda Guðrúnu Katrínu tölvupóst á netfangið gudkat76@hotmail.com.