Eigandi Sögusafnsins kvíðir sölu Perlunnar

Eigandi Sögusafnsins í Perlunni segist lifa milli vonar og ótta um að þurfa ekki að yfirgefa Perluna ef hún verður seld. Sögusafnið er hannað og byggt inn í einn tankinn í Perlunni. Ernst J Backman, sem rekur safnið, segist hafa varið 120 milljónum króna í uppbygginguna.

„Ég er svo sem ekkert farinn að velta því fyrir mér hvað ég á að gera ef ég þarf að fara," segir Ernst. Hann viðurkennir þó að hann sé kvíðinn. „Ég veit allt of lítið og ég veit ekkert hvernig þetta fer," bætir hann við.

Ernst segir að safnið hafi hingað til gengið vel. Hann segir að langstærstur hluti gestanna séu útlendingar. „Þetta er í raun og veru orðið mjög þekkt safn úti í heimi," segir hann og bætir við að safnið sé eflaust eitt af þeim mest sóttu í Reykjavík.

Frestur til að skila inn tilboðum í Perluna rann út í gær. Sex tilboð bárust en enn hafa engar upplýsingar verið gefnar um það hvernig tilboðin hljóma.