Næturvaktin til Noregs

Þeir Ólafur Ragnar, Georg og Daníel úr Vaktaseríunum svokölluðu eru flestum kunnugir enda slógu þættirnir all rækilega í gegn hér á landi.

Nú munu frændur okkar norðmenn fá að kynnast strákunum því norska sjónvarpsstöðin TV2 er að ráðst í framleiðslu á Næturvaktinni.

Í Fréttablaðinu í dag segir að sjónvarpsstöðin ætli að tefla fram öllum sínum stærstu og sterkustu vopnum þegar endurgerðin hefst í byrjun næsta árs. Leikstjóri verður Magnus Martens sem þessa dagana er að klára kvikmyndina Arme Riddere eftir bók norska sakamálahöfundarins Jo Nesbø og þrír af vinsælustu gamanleikurum Noregs verða í aðalhlutverkunum að sögn Christophers Haug, eins af aðalframleiðendum leikins efnis hjá TV 2.