Stöð 2 fáránlega töff

Stöð 2 er 25 ára í dag, sunnudaginn 9. október. Í tilefni af því rifjar einn fremsti sjónvarpsmaður stöðvarinnar, Logi Bergmann, upp kynni sín af henni.

"Ég man eftir því þegar Stöð 2 fór í loftið. Mér fannst hún alveg fáránlega töff og man eftir að hugsa um að mig langaði til að vinna þarna. En það tók tæp 18 ár.

Reyndar kom það til tals árið 1993 og þá sem íþróttafréttamaður. En úr því varð ekki og nokkrum árum síðar munaði reyndar ótrúlega litlu. Þá var samningurinn tilbúinn og ekkert eftir annað en að renna til Páls Magnússonar og skrifa undir. Á síðustu stundu hætti ég við og man eftir reiðilestrinum frá honum í símann.

Svo gerðist þetta loksins í september 2005. Því fylgdi náttúrlega heilmikil dramatík en ég hef aldrei séð eftir því. Stöð 2 er gríðarlega skemmtilegur vinnustaður og hér er alltaf eitthvað nýtt að gerast. Stöðin hefur verið á mikilli siglingu síðustu ár og í fararbroddi í framleiðslu íslensks efnis.

Breytingin, á þeim 25 árum sem liðin eru síðan stöðin fór í loftið, er nánast eins og bylting. Bara tæknibreytingarnar hafa verið svo ótrúlegar, svo maður nefni ekki hvernig viðhorfið hefur breyst.

Ég held að við eigum eftir að sjá miklar framfarir á næstu árum. Og ég held að Stöð 2 hafi fetað rétta braut í því að skapa sér sérstöðu með íslensku efni. Framtíðin og sjálfstæði stöðvarinnar liggur fyrst og fremst í því að halda áfram á þeirri braut. Og ég hef engar áhyggjur af því hvernig henni vegnar á næstu árum."