So You Think-stjörnurnar koma til Íslands næstu helgi

Dómarinn Lil C og keppandinn Legacy úr þáttunum So You Think You Can Dance? eru væntanlegir til landsins fyrir næstu helgi. Þeir koma sérstaklega á vegum DanceCenter Reykjavík, til að kenna á danshátíð skólans, Dansfestivali, sem fram fer um næstu helgi.

Lil C er bæði þekktur fyrir að vera dómari í þáttunum, danshöfundur og fyrir að vera guðfaðir krumpsins. Hann ætlar að kenna hip hop og krump á Dansfestivalinu. Þar komast íslenskir dansarar í feitt því Lil C er meðal heitustu danshöfundanna vestanhafs. Hann hefur meðal annars samið fyrir Madonnu og Missy Elliott og dansað með fjölda stjarna á borð við Jennifer Lopez. Einnig leikið í bíómyndum á borð við Step Up-myndirnar og You Got Served.

Sjá syrpu með Lil C hér.

Legacy sló í gegn í So You Think You Can Dance? fyrir nokkrum árum og hefur gert það gott í kjölfarið. Hann mun kenna breik og hip hop.

Legacy sendi sérstaka kveðju til Íslands í gegnum netið fyrir nokkrum dögum. Sjá kveðjuna frá Legacy hér.

Þeir hlakka mikið að koma til landsins enda deila þeir sömu ástríðu og aðstandendur DanceCenter Reykjavík, það er að breiða út dansinn og ná því besta út úr nemendum. DanceCenter hefur áður náð að fá slíkt hæfileikafólk til landsins en markmið Dansfestivalanna er að styðja við grasrót dansins og geta boðið öllu áhugafólki upp á vandaða danskennslu.

Nú þegar er byrjuð að myndast mikil spenna fyrir námskeiðum þessara meistara en aðstandendur dansfestivalsins leggja áherslu á að það sé fyrir alla og að dansgleðin sé í fyrirrúmi. Þannig er nemendum skipt upp í hópa eftir aldri og getu þannig að allir fái að njóta sín. Í lok Dansfestivalsins verða síðan opnar prufur fyrir glæsilega sýningu í anda þáttanna.

Námskeiðin verða haldin á þremur stöðum, hjá Þrótti í Laugardal, í Vallarhúsinu í Fagralundi í Kópavogi og í Sjálandsskóla í Garðabæ. Skráning og nánari upplýsingar á dancecenter.is.