Hælisleitandinn skildi eftir sjálfsmorðsbréf

Hælisleitandinn Mehdi Pour afhenti vinkonu sinni sjálfsmorðsbréf áður en hann fór upp í Rauða kross hús þar sem hann reyndi að kveikja í sér. Hann hefur verið úrskurðaður í tveggja vikna gæsluvarðhald á viðeigandi stofnun.

Kolfinna Baldvinsdóttir er náin vinkona Mehdi. Hún segir sögu hans víti til varnaðar. „Mehdi var að senda okkur skýr skilaboð í gær. Hann var ekki að senda okkur skilaboð vegna trúarbragða hans eða landsins sem hann kom til hann var að senda skilaboð til íslensks samfélags og yfirvalda," segir Kolfinna.

Kolfinna segir Mehdi hafa unnið fyrir leyniþjónustuna í Íran en eftir mistök í starfi sem kostaði þrjá kollega hans lífið hafi hann ákveðið að flýja til Kanada og skilja eftir konu sína og barn.

„Hann fannst hins vegar ráfandi um þjóðveginn rétt hjá Höfn í Hornafirði," segir Kolfinna.

Mehdi talaði litla sem enga ensku á þessum tíma. Hann var kallaður „pabbinn" á FIT hostelinu, þar sem flóttamenn á Íslandi eru vistaðir.

„Ég hef stundum kallað Mehdi eftirlegukind Björns Bjarnasonar. Hann kemur hingað í hans tíð þegar flóttamannamál voru í miklum lamasessi. Það var skelfilegt ástand," segir Kolfinna.

Mehdi fór í hunguverkfall árið 2008 til að vekja athygli á málstað sínum og fékk bót sinna mála.

„Hann fær frelsi til að ganga út úr litla herberginu á FIT hostel og fara alla leið til Reykjavíkur og leigja sér íbúð og finna sér vinnu," segir Kolfinna.

Síðan 2008 hefur Mehdi verið í fullri vinnu á veitingastaðnum Ruby Tuesday. Ný reglugerð gerði honum kleyft að sækja um dvalarleyfi af mannúðarástæðum í janúar. En mánuðirnir liðu og örvæntingin tók yfir. Á sunnudaginn fyrir tæpri viku hitti Kolfinna Mehdi sem hafði þá þegar tekið ákvörðun.

„Ég var búin að vara alla við. Svo vara ég aftur við núna. Ég hringdi í útlendingastofnun og lögregluembættið og sagði þeim að eitthvað hræðilegt væri að fara að gerast," segir Kolfinna og bætir því við að Mehdi hafi skilið eftir sig hinsta bréfið sitt.

Kolfinna segir skilaboð Mehdis vera þau að flóttamenn eru líka menn.