Innlent

Vill banna brauðgjafir á Reykjavíkurtjörn

Lillý Valgerður Pétursdóttir skrifar

Besta ráðið til að halda mávinum frá Tjörninni í Reykjavík er að banna brauðgjafir yfir sumartímann. Þetta segir meindýraeyðir hjá borginni en mikið er kvartað yfir ágangi mávsins.

Það er einn af vorboðunum að sílamávur fylli tjörnina í Reykjavík. Mörgum finnst nóg um enda er mávurinn oft aðgangsharður.

Sílamávar eru farfuglar og sjást þeir fyrstu jafnan hér á landi um miðjan mars. Restin kemur svo í apríl. Mávarnir verða strax við komuna fyrirferðamiklir á tjörninni en þeim fækkar þó aðeins um miðjan maí þegar varp hefst. Meindýraeyðir borgarinnar fá fjölda kvartana á hverju sumri vegna mávsins.

Ómar Dabney, meindýraeyðir hjá Reykjavíkurborg segir mávana svo aðgangsharða að þeir éti allt brauð sem kastað sé á tjörnina. Þá er græðgin slík að þeir bíta brauðið úr höndum barnanna.

Auk þess gæði mávurinn sér oft á andarungum yfir sumartímann. Ómar segir að árið 2007 hafi síðast verið reynt að halda mávinum í skefjum með því að skjóta hann. Það hafi aðeins dugað í skamman tíma. Hann telur að eina leiðin til að draga úr mávum á tjörninni sé að banna brauðgjafir yfir sumartímann - en mávurinn fer af landinu um miðjan október.

Ómar segir að best væri að brauðgjafir væru bannaðar frá apríl og fram í september. Þá væri vandamálið úr sögunni að hans mati. Spurður hvort það hefði áhrif á endur og svani á tjörninni, svarar Ómar því til að það sé nægt æti í tjörninni fyrir aðra fugla.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.