Almúgapartý á Gullöldinni í kvöld

„Þetta partý verður hreint út sagt frábært og verða heimatilbúin skemmtiatriði eins og við gerum best hérna á Gullöldinni," segir Davíð Þór Rúnarsson hjá Gullöldinni í Grafarvogi. Í kvöld verður „Almúgapartý" á Gullöldinni en hugmyndin kom eftir að grein birtist á vefnum bleikt.is um VIP-partý á Replay.

Á facebook síðu viðburðarins segir að „það vanti þessa almúgamenningu í Íslenskt skemmtanalíf. [...] Við bjóðum ekki upp á rauðan dregil heldur einungis ískalda hellulagða stéttina fyrir utan Gullöldina," segir á síðunni.

„Það verða enginn flöskuborð þar sem það hefur enginn haft efni á því að kaupa heila flösku á Gullöldinni hvorki fyrr né síðar en við ætlum að slá um okkur og splæsa í sprittkerti í stjaka og smella á hvert borð," segir ennfremur á síðunni.

Partýið byrjar á slaginu klukkan 22 og lofar Davíð Þór miklu stuði. „Þemað í kvöld verður VIP vs. almúginn og verður atburðarrás vikunnar í aðalhlutverki."

Nánari lýsingu á partýinu er að finna hér.