Stelpuslagur í nýja Britney-myndbandinu

„Það er mér sönn ánægja að kynna nýja myndbandið mitt við lagið Hold It Against Me. Ég vona að þið fílið það jafnvel og ég. Ef ekki þá tek ég kung fu-spark á ykkur eins og ég geri við stelpuna í myndbandinu," skrifaði poppprinsessan Britney Spears á Twitter-síðu sína í gærkvöldi.

Nýja myndbandið hennar fór í loftið á MTV-tónlistarstöðinni í gær en það er Svíinn Jonas Åkerlund sem leikstýrir því. Horfið á myndbandið með því að smella á hlekkinn hér fyrir ofan.

Aðdáendur Britney hafa beðið myndbandsins í ofvæni síðustu vikur, enda hefur hún birt nýtt brot úr því vikulega og það hefur verið auglýst mikið í Bandaríkjunum.

Lagið er fyrsta smáskífan af sjöundu plötu hennar, Femme Fatale, sem kemur út á næstunni. Smáskífan náði toppsætinu í Bandaríkjunum þegar hún kom út fyrir um mánuði síðan.

Í myndbandinu sést Britney slást við sjálfa sig og telja poppfræðingar hana gefa þannig í skyn að hún ætli sér að ná stjórn á ímynd sinni.