Vafi á faðerni sonar Owens Wilson

Leikarinn Owen Wilson eignaðist sitt fyrsta barn fyrir mánuði ásamt kærustu sinni, Jade Duell. Fyrrverandi kærasti Duell vill þó meina að barnið gæti allt eins verið hans.

„Jade bjó enn með fyrrverandi kærasta sínum þegar hún hóf samband sitt við Owen," var haft eftir heimildarmanni. „Hún var enn í föstu sambandi með sínum fyrrverandi þegar hún og Owen byrjuðu að hittast og hún sleit því sambandi ekki fyrr en hún komst að því að hún væri ólétt."

Wilson og Duell kynntust árið 2009 og hófst samband þeirra skömmu eftir það. Parið bjó þó hvort í sínu fylkinu allt þar til Duell tilkynnti Wilson að hún ætti von á barni.

„Þau hittust reglulega og Jade flaug oft til Kaliforníu til að hitta Owen, en sambandið varð ekki alvarlegt fyrr en hún varð ófrísk. Jade hætti þá með sínum fyrrverandi og flutti inn með Owen," sagði heimildarmaðurinn, sem heldur því fram að fyrrverandi kærasti Duell fari fram á barnsfaðernispróf.