Arnar Gunnlaugs á bakvið Borgríki

„Mitt hlutverk var ósköp lítið, fyrirtækið mitt setti bara smá pening í myndina á lokasprettinum þannig að hægt væri að klára hana og markaðssetja," segir knattspyrnukappinn og athafnamaðurinn Arnar Gunnlaugsson.

Hann er svokallaður „executive producer" Borgríkis, kvikmyndarinnar sem sýnd er um þessar mundir í kvikmyndahúsum landsins og fengið hefur frábæra dóma víðast hvar. „Ég sá hana og var mjög hrifinn," segir Arnar sem var staddur á Flórída í fríi þegar Fréttablaðið náði tali af honum.

Arnar hefur um árabil verið einn fræknasti knattspyrnumaður landsins og lék í sumar stórt hlutverk með liði Fram sem bjargaði sér á ævintýralegan hátt frá falli í Pepsi-deild karla. Hann hóf hins vegar að horfa til sjónvarps- og kvikmyndagerðar fyrir skömmu þegar hann stofnaði framleiðslufyrirtæki með kvikmyndagerðarmanninum Gesti Val Svanssyni, en saman gerðu þeir sjónvarpsþáttaröðina Tríó. Arnar upplýsir að skrif á þáttaröð númer tvö standi nú yfir.

Knattspyrnukappinn viðurkennir að kvikmyndagerð og allt sem henni tengist sé mikið áhugamál hjá sér. Og hann sé að fikra sig áfram í þessum heimi. Frumraunin á hvíta tjaldinu lofar að minnsta kosti góðu því á dögunum var tilkynnt að James Mangold hygðist leikstýra endurgerðinni í Bandaríkjunum. Arnar hafði reyndar ekki heyrt af því en sagði það afar gleðilegar fréttir. „Það er bara æðislegt." - fgg