Baðaði sig upp úr laxerolíu

„Já, þetta fór ekki alveg eins og þetta átti að fara,“ segir Sigrún Blomsterberg dansari en hún ætlaði sér stóra hluti í prufunum fyrir dansþáttinn Dans Dans Dans sem fóru fram um helgina.

Sigrún meiddist í nára á föstudeginum en reyndi að gera allt svo hún gæti tekið þátt í keppninni á laugardeginum. „Ég var byrjuð að finna fyrir smá eymslum á föstudaginn en svo þegar ég var að fínpússa atriðið mitt um kvöldið fór ég alveg í náranum,“ segir Sigrún. Hún var í beinu sambandi við sjúkraþjálfarann sinn um nóttina og lá meðal annars í laxerolíubaði góða stund, en það á að mýkja vöðva og hjálpa til við að vinna bug á meiðslum af þessu tagi.

„Ég er vön að harka öll meiðsli af mér og hef dansað bæði rófubeins- og rifbeinsbrotin. Ég er svo þrjósk að ég var meira að segja komin í gallann og á leiðinni upp í Laugardalshöll haltrandi á laugardagsmorguninn. Svo áttaði ég mig á því að ég væri ekkert að fara að taka þátt svona haltrandi og aum,“ segir Sigrún en hún sagði í viðtali við Fréttablaðið fyrir viku að hún væri með brjálað atriði í undirbúningi.

„Nú verð ég bara heima að horfa á þáttinn sem verður óneitanlega bæði gaman og skrýtið, því ég var orðin spennt yfir að taka þátt. Ég verð bara að geyma atriðið mitt til betri tíma,“ segir Sigrún sem verður bara að liggja heima og jafna sig á meiðslunum næstu daga og hefur því aflýst allri kennslu næstu daga. „Það er erfitt þegar maður vinnur við að hreyfa sig að þurfa að slaka á en ég verð róleg í smástund og kem svo aftur af fullum krafti.“ - áp