Bræður undrandi á gagnrýni

Leikstjórarnir Joel og Ethan Coen eru undrandi á ummælum sumra kvikmyndagagnrýnenda um að nýjasta mynd þeirra, True Grit, sé ekki eins góð og fyrri verk þeirra. Myndin hlaut fyrir skömmu tíu tilnefningar til Óskarsverðlaunanna. Á meðal annarra mynda þeirra sem hafa þegar fengið Óskarsverðlaun eru Oh Brother, Where Art Thou?, Fargo og No Country For Old Men.

„Það kom mér á óvart,“ sagði Ethan spurður út í orð gagnrýnenda um að True Grit sé ekki nógu Coen-leg. „Við reynum alltaf að hafa myndir okkar eins langt frá því að vera Coen-legar og hægt er, hvað sem það nú þýðir. Fólk spyr út í stílinn sem maður notar í myndunum en við erum bara að reyna að segja söguna á réttan hátt. Við erum ekki að reyna að merkja okkur hana með því að pissa á hana eða eitthvað slíkt,“ sagði hann.

Joel og Ethan fannst gott þegar litið var á þá sem utangarðsmenn í Hollywood hér á árum áður. Núna hikar kvikmyndaborgin ekki við að hampa þeim og það finnst þeim skrítið „Við eyddum miklum tíma utangarðs af algjörri nauðsyn,“ sagði Joel. „Allt í einu kemur þessi stóra hönd og réttir okkur Óskarsverðlaunin af himnum ofan. Það hræðir mann og maður fer að hugsa hvar manni hefur orðið á.“