Laumar sér bakdyramegin inn í stórmynd í Hollywood

„Það vantaði bara íslenskar raddir og ég var beðinn um að koma og syngja íslenska drykkjusöngva og segja setningar á íslensku," segir Stefán Karl Stefánssson, leikari í Bandaríkjunum. Rödd hans og nokkrar velvaldar setningar á íslensku heyrast væntanlega í stórmyndinni Thor sem verður frumsýnd 6. maí. Þetta er ekki í fyrsta skipti sem Stefán Karl er kallaður í slíkt verkefni því hann talaði einnig inn á Night at the Museum með Ben Stiller fyrir fimm árum.

Stefán segir þetta hafa verið níu tíma vinna. „Ég kenndi fimmtán manna leikarahópi að tóna Hávamál og syngja upp á íslensku og svo voru þetta bara allskonar bakraddir." Þetta verkefni flokkast sem „voice over" og töluvert stór hópur manna og kvenna í Hollywood hefur sérhæft sig í að mynda allskonar mennsk aukahljóð inn á myndir til þess að ljá ákveðnum hlutum meiri dýpt.

„Það er kannski einhver stjarna laminn í magann og þá vantar kannski hærra hljóð frá honum. Þá er ekkert hægt að hringja í stjörnuna og biðja hana um að koma í hljóðver og gefa frá sér svona hljóð heldur er það bara svona „voice over"-leikari sem sér um það," útskýrir Stefán. Og þannig fór vinnan við Thor fram. Stefán sat í hring með þessum fimmtán manna hópi, svo komu ákveðin atriði sem þurfti að bæta og þá stóð einhver upp og gaf frá sér hljóð eða sagði eitthvað orð.

Því er spáð að Thor verði ein af sumarsmellum ársins í ár en myndin skartar stórstjörnum á borð við Natalie Portman og Anthony Hopkins í helstu hlutverkum auk Chris Hemsworth sem leikur hinn vöðvastælta þrumuguð Þór. Leikstjóri er Kenneth Brannagh og hann var að sjálfsögðu viðstaddur upptökurnar. Stefán veit hins vegar ekki hversu mikið heyrist af íslenskunni í myndinni, það hafi til dæmis ekkert heyrst frá honum í Night at the Museum.

„Ég er nánast alveg klár á því að það heyrist vel „Heill sértu Þór" þegar hann er krýndur sem konungur í myndinni." Stefán segir þetta hafa verið ákaflega skemmtilega reynslu, þetta sé svona bakhliðin á kvikmyndagerðinni. Hann bjóst hins vegar ekki við því að fara leggja þetta fyrir sig. „Það var mjög skemmtilegt að sjá þennan ættbálk svokallaðra „voice over"-leikara. Og þeir hafa sæmilega upp úr þessu, hundrað þúsund krónur á dag."

freyrgigja@frettabladid.is