Ný norræn tónlistarhátíð

„Íslendingar eru svo gegnsósa af bandarískri og breskri tónlist að það er orðið tímabært að kynna fyrir þeim nýja tónlist. Og hvar er þá betra að byrja en í nágrannalöndunum? Þar er alveg heill hellingur í gangi," segir Gunnhildur Gunnarsdóttir, einn af forsvarsmönnum nýrrar tónlistarhátíðar

sem hefur verið gefið nafnið Reykjavík-Bergen-Nuuk. Eins og nafngiftin gefur til kynna munu tónlistarmenn frá þessum þremur borgum spila en ráðgert er að hátíðin standi yfir frá 25.-27. febrúar. Heimavöllur hennar verður í nýju leikhúsi úti á Seltjarnarnesi, Norðurpólnum.

Gunnhildur, sem er framkvæmdastjóri leikhópsins Vesturports, segir að draumurinn sé auðvitað að þetta verði að árvissum viðburði, tónlistarhátíðin stækki með hverju ári og fleiri norrænar borgir bætist í hópinn.

„Við erum með styrk frá Norræna menningarsjóðnum og erum að vona að þetta verði til þess að opna augu fólks fyrir því sem er að gerast í næsta nágrenni við okkur."

Sjálf segist Gunnhildur hafa til að mynda verið með efasemdir gagnvart grænlenskum tónlistarmönnum en þegar hún fletti einni hljómsveitinni upp á YouTube komst hún að raun um að áhyggjur hennar voru algjörlega óþarfar. Þetta voru bara hennar eigin fordómar.

„Þetta voru bara sætir strákar með húðflúr að spila virkilega flotta rokktónlist." Að sögn Gunnhildar er enn ekki staðfest hvaða íslensku sveitir munu spila en það mun skýrast á næstunni. - fgg